කල් මැරූ කාලය

වහිනකං මං උන්නා

ඇඟිලි රතු වෙනකන් ගැන්නා

ගිම්හාන කාලයට

යලි නොඑන ලෙස බැන්නා

වැහි බිංදු දුක් දුන්නා

ඒ බරට හිත රිදුනා

වස්සාන කාලයම

නෙත් මත්තෙ ඇද හැලුනා

පාලුවට කවි ගෙතුනා

ඔබට ඇහෙතැයි සිතුනා

සීතලට ගල්ගැහුන

ඔය හිතේ අද්දරම රැඳුනා

මියෙන හුස්මක රැඳෙනා

මතක ඇතිබව දැනුනා

මල් පිපෙන වසන්තය

ඔබට නොව මට මග හැරුනා

 

උගස

කඹුරලා කාලාන්තරයක්

පොදිගහපු හීන අහුරක් 

දුන්නා උගසට උඹේ අතටම 

හිතේ අගහිඟ මැකෙන ගානට 

තේරුම්ගියා පහු වෙනකොට

සින්නවෙන බව මටත් නොදැනිම

උඹ ඉල්ලන ගිනි පොලියට 

දෙන්න තව මට හීන නැතුවට

පොද

අඳුර එළිය අතර පැතිර 

බිඳුණු පොදක සිසිල දැනුන 

විසිරි සිතක පතුලෙ රැඳුන

මතක ඉපදී මැරෙන අරුම

මනාපෙ

සිංහ වංසෙන් ආව මට

හරි අමාරුයි ඇස් පියන් ඉන්ට

අවුලන්න උඹේ ජාතික කැක්කුම

ආව මන් ගේ දොරකොඩටම

දීපන් මටත් දෙක තුනක්

පිස්සුද එහෙමත් අමතක වෙයිද බන්?

ඔව් ඔව් අපෙ සීයා ඉපදුන ගම මේක

හිටියට මං දැන් දුර ඈත කොලඹ රට

ගමේ කැක්කුම පපුවෙ පැත්තක

නිතර දෙවොලේ මෙහේ නාවට

උඹේ එකා ටවුමෙ ජාතිකේට

අපේ එකාටත් හොඳ කලක් යන්ඩ

ගමේ පාරට තාර ටික

මගේ රෝද හතර නොගෙවෙන්ට

දූෂනේට මතට තිත

හීන් අඩියක් කැන්වසින් කාලෙට

ගමේ කොල්ලන්ට ෂුවර් ජොබ් ටික

කැලේ කපන්නෙ අලුත් හෝටලේට

බොක්කෙන්ම මං ගමට වැඩ

මරණෙට පිංකමට ඕනි මගුලකට

‍යැව්වොත් මාව මහ සබාවට

ගොඩ තමයි ඉතිං හතර වරිගෙම

නෑ නෑ හරියට ඇහුනෙ නෑ උඹට

මං කිව්වෙ ජය මුලු ගමටම

සිහිනය

නිල් සයුර මත නැගුන
ධවල දළ රළ නුඹයි
තනි අහස එකළු කළ
උදුල සඳවත නුඹයි
මියෙන රළු පොළොව මත
වැටුණ පිනි බිඳ නුඹයි
සැබෑ නොවෙතැයි සිතූ
මගේ සිහිනය නුඹයි

පැතුම

සොඳුරු සඳ බැසගිහින්
කළුවරයි ජීවිතය
තරු පොකුරු කෙලෙසනම්
මකන්නද කාන්සිය

දෑස දස අත බලයි
සුසුම් වැල් ඉකි ගසයි
සිහිනෙකින් මිස දිලෙන
නුවන් යුග හමු නොවෙයි

ගිලන් වී මියැදෙනා
පැතුම් මල් පොදි අතර
නැවුම් කැකුළක් කෙදින
යළිත් විකසිත වෙයිද

ගිනියම්ව දැවෙන හද ගැබට
සිසිලක් දෙන්න
සිහින් පොද වැස්සකට
ඉඩක් ඇත්තෙම නැද්ද

ඔබ, මා, අද

මා මලක් විය පෙති දරාගෙන
සැඩ හිරුට නෙත් අගින් හිනැහුන
නුඹ ඇවිත් සුළඟක් වගේ මට
තනිය දී පෙති තලා පොඩි කර

දුර ඈත හද අරන් ගිය සඳ
මගේ ජීවය නැතිවුනා මට
වියළි විසිරුන ලෝකයක් තුළ
වෙනත් කිසිවෙක් නැහැ ඔබම මිස

බඳින්නට සිතුවිලි හදක් නැත
නෙතක් ඇතිමුත් කඳුළු කැට නැත
සිනාවත් අමතක කරන් මට
ගියා ඔබ මුළු ලොවට රහසෙම

දැනෙයි ඔබහට හදක් මල වග
නමුදු හද මිස මා මලේ නැත
යළි යළිත් ඉපදී අතීතෙක
නැවත මියයමි වර්තමානෙක